ພັດທະນາຂະ​ແໜງ​ພະລັງງານ-ບໍ່​ແຮ່ ​ໄປ​ຕາມ 4 ບຸກທະລຸ ຄຽງ​ຄຸ່ກັບ​ການຈັດຕັ້ງປະຕິບັດ 3 ສ້າງ

(ຂປລ): ກະຊວງ​ພະລັງງານ ​ແລະ ບໍ່​ແຮ່ ມີ​ບົດບາດ​ ​ແລະ ໜ້າ​ທີ່ຄຸ້ມຄອງ​ ​ການ​ເຄື່ອນ​ໄຫວ​ດ້ານ​ພະລັງງານ ​ແລະ ການ​ຂຸດ​ຄົ້ນ​ບໍ່​ແຮ່ ​ໃຫ້​ໄປ​ຕາມ​ທິດ​ຍືນ​ຍົງ ຫັນ​ເປັນ​ອຸດສາຫະກຳ, ຫັນ​ເປັນ​ທັນ​ສະ​ໄໝ ​ແລະ ຊ່ວຍ​ຊູ​ຍູ້​ໜູນ​ຂະ​ແໜງ​ການ​ຕ່າງ​ໆໃຫ້​ໄດ້​ຮັບ​ການ​ພັດທະນາ ​ໂດຍ​ປະຕິບັດ​ຕາມ 4 ບາດກ້າວບຸກທະລທີ່​ກອງ​ປະຊຸມ​ໃຫຍ່ ຄັ້ງທີ IX ຂອງ​ພັກ​ວາງ​ອອກ ​ແລະ ​ໃນ​ປະຈຸ​ບັນ​ແມ່ນ​ກຳລັງດຳ​ເນີນ​ການຈັດຕັ້ງປະຕິບັດ​ວຽກ​ງານ 3 ສ້າງ ຕາມ​ມະຕິ 3 ຂອງ​ກົມ​ການ​ເມືອງ​ສູນ​ກາງ​ພັກ ລົງ​ວັນ​ທີ 15 ກຸມພາ 2012.

ທ່ານ ສຸ​ລິ​ວົງ ດາລາ​ວົງ, ລັດຖະມົນຕີ​ວ່າການ​ກະຊວງ​ພະລັງງານ ​ແລະ ບໍ່​ແຮ່ ​ໄດ້​ໃຫ້​ສຳ​ພາກ​ຕໍ່​ສື່​ມວນ​ຊົນ ​ໃນ​ວັນ​ທີ 09 ຕຸລາ 2012 ​ໃນ​ໂອກາດ​ເຂົ້າຮ່ວມ​ກອງ​ປະຊຸມ ຄະນະ​ ລັດຖະບານ ຮ່ວມ​ກັບ​ເຈົ້າ​ແຂວງ​ທົ່ວ​ປະ​ເທດ ທີ່ສຳນັກງານ​ຫ້ອງ​ວ່າການ​ລັດຖະບານ ​ໂດຍ​ທ່ານ​ໄດ້​ແຈ້ງ​ໃຫ້​ຊາບ​ວ່າ: ​ໃນ​ການຈັດຕັ້ງປະຕິບັດ​ແຜນ​ພັດທະນາ​ເສດຖະກິດ-ສັງຄົມ ​ແຫ່ງ​ ຊາດ ຂະ​ແໜງ​ພະລັງງານ ​ແລະ ບໍ່​ແຮ່ ​ໄດ້​ເຄື່ອນ​ໄຫວ​ຈັດ​ຕັ້ງ​ປະຕິບັດໜ້າ​ທີ່​ວິຊາ​ສະ​ເພາະ​ສຳ​ເລັດ​ຫລາຍ​ປະການ. ​ໃນ​ສົກ​ປີ 2011-2012 ຂະ​ແໜງ​ພະລັງງານ ​ແລະ ບໍ່​ແຮ່ ​ໄດ້​ປະກອບສ່ວນ​ໃນ​ ການ​ເພີ່ມ​ຍອດ​ມູນ​ຄ່າ​ຜະລິດ​ຕະພັນ​ພາຍ​ໃນ​ຂະ​ແໜງ​ເພີ່ມ​ຂຶ້ນ 19,79% ຕໍ່​ປີ ​ໃນ​ນັ້ນພະລັງງານ ​ເພີ່​ມຂຶ້ນ 32,56% ​ແລະ ຂະ​ແໜງ​ບໍ່​ແຮ່ ​ເພີ່ມ​ຂຶ້ນ 15,68% ຕໍ່​ປີ. ມາ​ຮອດ​ເດືອນ ສິງຫາ ປີ 2012 ປະຊາຊົນ 80,1% ຂອງ​ຄອບຄົວ​ໃນ​ທົ່ວ​ປະ​ເທດ ​ໄດ້​ຊົມ​ໃຊ້​ໄຟຟ້າ​ແລ້ວ, ຊຶ່ງ​ຖື​ວ່າ​ປະຕິບັດ​ໄດ້​ລື່ນຄາດໝາຍຂອງ​ແຜນການ 5 ປີ ຄັ້ງທີ 7, ສິນຄ້າ​ ຂາ​ອອກພະລັງງານ ​ແລະ ​​ແຮ່ທາດ ບັນລຸ 2,1 ຕື້​ໂດ​ລາ​ສະຫະລັດ. ປະຈຸ​ບັນ​ມີ ​ໂຮງງານ​ໄຟຟ້າ​ທີ່​ຜະລິດ ​ໄຟຟ້າ​ເພື່ອ​ຮັບ​ໃຊທັງ​ພາຍ​ໃນ ​ແລະ ຕ່າງປະ​ເທດ ມີ 18 ​ແຫ່ງ ລວມ​ເປັນ 2.572 ​ເມ​ກາ​ວັດ, ທົ່ວ​ປະ​ເທດ​ມີ​ສາຍ​ສົ່ງ​ໄຟຟ້າ ພາຍ​ໃນ​ 39.173 ກິ​​ໂລ​ແມັດ. ສະ​ເພາະ​ໃນ​ປີ 2012 ມີ ໂຮງງານ​ໄຟຟ້າ 4 ​ແຫ່ງ​ເປີດ​ນຳ​ໃຊ້​ໃໝ່ ​ແລະ ມີ 1 ບໍ່​ຄຳ ​ແລະ ​ເງິນ ​ໄດ້​ເປີດ​ ນຳ​ໃຊ້​ປົກກະຕິ, ກຳລັງ​ດຳ​ເນີນ​ການ​ກໍ່ສ້າງໂຮງງານ​ໄຟຟ້າ​ນ້ຳຕົກ​ໃໝ່ 9 ​ແຫ່ງ, ມີ​ກິດຈະການ​ຂຸດ​ຄົ້ນ​ແຮ່​ຕ່າງໆ 25 ​ແຫ່ງ ຊຶ່ງ​ກຳລັງ​ຢູ່​ໃນ​ໄລຍະ​ກໍ່ສ້າງ. ສັງ​ ລວມ​ແລ້ວ​ເຫັນ​ໄດ້​ວ່າ​ຂະ​ແໜງ​ພະລັງງານ ​ແລະ ບໍ່​ແຮ່ ​​ໄດ້ມີ​ການ​ພັດທະນາ, ມີ​ການຈັດຕັ້ງປະຕິບັດ​ແຜນ​ພັດທະນາ​ເສດຖະກິດ-ສັງຄົມ ​ໄດ້​ດີ​ພໍ​ສົມຄວນ, ທຸກໆ​ຄາດໝາຍ​ທີ່​ໄດ້​ ເວົ້າ​ກ່ຽວ​ກັບ​ຂະ​ແໜງ​ ພະລັງງານ​ບໍ່​ແຮ່​ ແມ່ນ​ລື່ນ​ຄາດໝາຍ​ທາງ​ດ້ານ​ເວລາ ​ແລະ ປະລິມານ. ຄ່ຽງຄູ່ກັບຜົນສຳ​ເລັດ​ດັ່ງກ່າວ​ນັ້ນ ກໍ​ຍັງ​ມີ​ຂໍ້​ຫຍຸ້ງ​ຍາກ ບາງ​ປະການ​ເຊັ່ນ: ມີ​ຫລາຍ​ໂຄງການ​ມີ​ລັກສະນະ​ຊັກ​ຊ້າ ຍ້ອນຜົນ​ກະທົບ​ຈາກ​ສະພາບ​ເສດຖະກິດຂອງ​ປະ​ເທດ​ໃກ້​ຄຽງ ທີ່​ຊື້ພະລັງງານ​ຈາກ ສປປ ລາວ ​ໂດຍ​ສະ​ເພາະ​ແມ່ນ​ສະພາບ​ຕະຫລາດ​ພະລັງງານ ສົ່ງ ​ຜົນ​ເຮັດ​ໃຫ້​ໂຄງການ​ຊັກ​ຊ້າ. ອີກ​ດ້ານ​ໜຶ່ງ​ແມ່ນ​ຄວາມ​ສາມາດ​ຄຸ້ມ​ຄອງ​ຂອງ​ພະນັກງານ ​ພ້ອມ​ດ້ວຍ​ພາຫະນະ​ອຸປະ​ກອນ​ຮັບ​ໃຊ້ຍັງ​ຈຳກັດ ບໍ່​ພຽງພໍ​ຕໍ່​ຄວາມ​ຮຽກຮ້ອງ​ຕ້ອງການ ​ແລະ ຄວາມ​ສາມາດ​ທາງດ້ານ​ທຶນຮອນ ​ເພື່ອ​ກໍ່ສ້າງ​ພື້ນຖານ​ໂຄງ​ລ່າງ ​​ເປັນຕົ້ນ​ແມ່ນ​ທາງ​ດ້ານ​ພະລັງງານສະໜອງ​ຮັບ​ໃຊ້​ຢູ່​ພາຍ​ໃນ​ປະ​ເທດ ຍັງ​ມີ​ຈຳນວນ​ຈຳກັດ.

ທ່ານ ລັດຖະມົນຕີ​ວ່າການ​ກະຊວງ​ພະລັງງານ ​ແລະ ບໍ່​ແຮ່​ ຍັງ​ໃຫ້​ຮູ້​ອີກ​ວ່າ: ສຳລັບ​ການຈັດຕັ້ງປະຕິ ບັດ​ວຽກ​ງານ 3 ສ້າງນັ້ນ ກະຊວງ​ພະລັງງານ ​ແລະ ບໍ່​ແຮ່ ກໍ​ເປັນ​ໜຶ່ງ​ໃນ 15 ກະຊວງ​ເຂົ້າ​ຮ່ວມ​ທົດ​ລອງ ​ໂດຍ​ໄດ້​ມີ​ການ​ແຕ່ງຕັ້ງຄະນະ​ຊີ້ນຳ ​ແລະ ກອງ​ເລຂາພ້ອມ​ທັງ​ໄດ້​ເຊື່ອມ​ຊຶມ​ບັນດາ​ເອກະສານ​ກ່ຽວຂ້ອງ. ຕະຫລອດ​ເດືອນ​ກັນຍາ 2012 ການ​ນຳ​ກະຊວງ​ ໄດ້​ປຶກສາ​ຫາລື ​ແລະ ​ເຊັນ​ບົດບັນທຶກ​ນຳ​ທຸກ​ແຂວງ, ນະຄອນຫລວງ​ກ່ຽວ​ກັບ​ວຍກງານ 3 ສ້າງ, ຊຶ່ງ​ໃນ​ບົດ​ບັນທຶກ​ໄດ້​ແບ່ງ​ລາຍ​ລະອຽດ​ເປັນ​ຂໍ້​ໆ​ຍ່ອຍ​ໃນ​ແຕ່ລະ​ໜ້າ​ວຽກ ບໍ່​ວ່າ​ຈະ​ແມ່ນ ພະລັງງານ, ບໍ່​ແຮ່, ​ໂຄງການ​ພາກ​ລັດ, ພາກ​ເອກະ​ຊົນ ​ແມ່ນ​ໄດ້​ກ່າວ​ເຖິງ​ການ​ແບ່ງ​ຂັ້ນ, ​ແບ່ງ​ງານ​ຄຸ້ມ​ຄອງ​ຈະ​ແຈ້ງ ລະຫວ່າງ​ກະຊວງ ​ແລະ ທ້ອງຖິ່ນ./.

ການເຮັດທຸລະກິດຕ້ອງຮັບຜິດຊອບຕໍ່ສັງຄົມ ໃນການປົກປັກຮັກສາສິ່ງແວດລ້ອມ

(ຂປລ) ທ່ານກິດສະໜາ ວົງໄຊ, ຜູ້ອຳນວຍການບໍລິສັດເບຍລາວ ກ່າວໃນງານພົບປະລະຫວ່າງບໍລິສັດເບຍລາວ ແລະ ສະມາຄົມນັກຂ່າວ ແຫ່ງ ສປປ ລາວ ໃນວັນທີ 6 ຕຸລາ 2012 ວ່າ:

ຄວາມຮັບຜິດຊອບຕໍ່ສັງຄົມຂອງບໍລິສັດເບຍລາວໃນໄລຍະຜ່ານມາ ແລະ ຄວາມຮັບຜິດຊອບຕໍ່ສັງຄົມໃນຍຸກປະຈຸບັນນີ້, ເປັນຫົວຂໍ້ໜື່ງທີ່ກຳລັງເດັ່ນ ແມ່ນເຮັດທຸລະກິດຕ້ອງຮັບ ຜິດຊອບຕໍ່ສັງ ຄົມໂດຍສະເພາະແມ່ນໃນການຮັບຜິດຊອບປົກປັກຮັກສາຕໍ່ສິ່ງແວດລ້ອມ, ການພັດທະນາບ້ານເມືອງ, ການປົກປັກຮັກສາຮີດຄອງປະເພນີ, ວັດທະນະທຳ-ສັງຄົມ ຂອງແຕ່ລະປະເທດຂອງທ້ອງຖິ່ນທັງດ້ານການຈັດສັນບຸກຄະລາກອນພາຍໃນກົມກອງ ແລະ ຂອງປະເທດສະນັ້ນ; ໃນຫົວຂໍ້ໜື່ງຂອງກອງປະຊຸມສຸດຍອດອາເຊັມ 9 ຢູ່ໃນກອງປະ ຊຸມພາກທຸລະກິດອາຊີ-ເອີຣົບ ໃນວັນ ທີ 3-5 ເດືອນ ພະຈີກ 2012 ທີ່ ສປປ ລາວ ໄດ້ຮັບກຽດເປັນເຈົ້າພາບນີ້; ກອງປະຊຸມພາກທຸລະກິດ, ລັດຖະບານລາວ ແລະ ສະພາການ ຄ້າ ແລະ ອຸດສາຫະກຳແຫ່ງຊາດ ກໍໄດ້ເອົາຫົວຂໍ້ໜື່ງ ເຂົ້າໃນກອງປະຊຸມ ໂດຍສະເພາະແມ່ນຫົວຂໍ້ຄວາມຮັບຜິດຊອບຕໍ່ສັງຄົມນີ້ ເພາະວ່າບັນຫານີ້ເປັນບັນຫາອັນພົ້ນເດັ່ນໃນໂລກ ປະຈຸບັນ ສະນັ້ນ; ນັກທຸລະກິດບໍ່ແມ່ນວ່າຄຳນືງແຕ່ຜົນປະໂຫຍດ, ຜົນກຳໄລ ຫລື ວ່າລາຍໄດ້ໃຫ້ແກ່ກົມກອງຂອງທຸລະກິດຕົນເອງ, ຂອງບໍລິສັດ. ຕ້ອງຄຳນຶງເຖິງ ຜົນສຳເລັດຂອງ ສັງຄົມ, ນັກທຸລະກິດຕ້ອງໄດ້ຄຳນຶງເຖິງການປົກປ້ອງໂລກແນວໃດ? ສະນັ້ນ; ຫົວຂໍ້ທີ່ຈະໄດ້ກ່າວໃນກອງປະຊຸມພາກທຸລະກິດອາຊີ-ເອີຣົບ ນີ້ ຈະໃຊ້ຫົວຂໍ້ວ່າຖະນຸຖະໜອມບຳລຸງ ຮັກສາໂລກຂອງພວກເຮົາ ແລະ ຈະປືກສາຫາລືພາກ ທຸລະກິດຈະຖະນຸຖະໜອມໂລກແນວໃດ? ສ່ວນບໍລິສັດ ເບຍລາວກໍໄດ້ຄຳນຶງບັນຫານີ້ມາ ແຕ່ດົນນານແລ້ວ ແລະ ໄດ້ເອົາ ໃຈໃສ່ເບີ່ງແຍງຊ່ວຍເຫລືອສັງຄົມມາຕະຫລອດ.

ອິກດ້ານໜື່ງການເອົາໃຈໃສ່ບັນຫາຕໍ່ສັງຄົມຂອງບໍລິສັດເບຍລາວແມ່ນການສະໜັບສະໜູນດ້ວຍຮູບການຊ່ວຍເຫລືອໃນທຸກຂະແໜງການນັບທັງກິລາ, ການສຶກສາ, ວັດທະນະທຳ, ໃນປີນີ້ທັງບໍລິສັດເບຍລາວ ກໍໄດ້ມອບຄູ່ມືການສຶກສາໃຫ້ແກ່ບັນດາເມືອງທຸກຍາກມີມູນຄ່າປະມານ 300 ກວ່າລ້ານກີບ, ນອກນີ້; ກໍໄດ້ເຮັດຫລາຍໆອັນຕໍ່ສັງຄົມ, ການຊ່ວຍ ເຫລືອຕໍ່ສັງຄົມຂອງບໍລິສັດເບຍລາວ ນີ້ແມ່ນການຊ່ວຍເຫລືອທີ່ຖືກຕ້ອງຕາມນະໂຍບາຍຂອງລັດຖະບານ, ຖືກຕ້ອງຕາມກົດໝາຍຂອງລັດ ແຕ່ລະປີ ມີການກວດຊອບຂອງ ອົງການກວດສອບແຫ່ງລັດ ແລະ ການກວດສອບຂອງອົງການສາກົນ ເພາະວ່າບໍລິສັດເບຍລາວກໍໄດ້ຮ່ວມທຶນກັບຄາສເບີກ. ກ່ຽວກັບນະໂຍບາຍຂອງບໍລິສັດເບຍລາວ ແມ່ນໃຫ້ ທຸກຄົນມີສ່ວນ ຮ່ວມໃນການສ້າງຄວາມພຶງພໍໃຈໃຫ້ເກີດກັບລູກຄ້າ, ສົ່ງເສີມຊື່ສຽງ, ພາບພົດທີ່ດີງາມພ້ອມກັນພັດທະນາບໍລິສັດໃຫ້ເຂັ້ມແຂງຕໍ່ເນື່ອງ ແລະ ຍືນຍົງ. ສ້າງຍີ່ຫໍ້ເບຍ ລາວໃຫ້ເປັນເບຍລະດັບສາກົນ ຕິດພັນກັບການຊ່ວຍເຫລືອສັງຄົມ, ໃຫ້ເປັນມິດທີ່ດີ ແລະ ປ້ອງກັນມົນລະພິດຕໍ່ສິ່ງແວດລ້ອມ.

 

ການ​ເຕີບ​ໂຕ​ ​ເສດຖະກິດ​ ​ອາຊີ​-ປາຊີ​ຟິກ ຈະ​ຊ້າ​ລົງ ແຕ່​ຈະຟື້ນ​ຕົວ​ຄືນ​ໃນປີໜ້າ

(ຂປລ): ໃນວັນ 8 ຕຸລາ 2012 ທີ່ສິງກະ​ໂປ, ທະນາຄານ​ໂລກ ໄດ້ລາຍ​ງານ​ຜົນການ​ຕິດຕາມ​ຂໍ້​ມູນການ​ເຕີ​ບ​ໂຕທາງ​ເສດຖະກິດ​ໃນ​ພາກ​ພື້ນ​ ອາຊີ​ຕາ​ເວັນ​ອອກ-ປາຊີ​ຟິກ ອາດ​ຈະ​ຊ້າ​ ລົງ​ໃນ​ລະດັບ​ເຕັມ​ໜຶ່ງ​ຈຸດ​ສ່ວນ​ຮ້ອຍ​ຈາກ 8,2% ໃນ​ປີ 2011 ມາ​ເປັນ 7,2% ກ່ອນ​ຈະ​ຟື້ນ​ຕົວ​ກັບ​ທີ່ 7,6% ໃນ​ ປີ 2013. ເສດຖະກິດ​ໃນ​ພາກ​ພື້ນ​ອາຊີ​ຕ​າ​ເວັນ​ອອກ-ປາຊີ​ຟິກ.

ອີງຕາມບົດລາຍງານຂອງ ທະນາຄານໂລກວ່າ: ການ​ເຕີບ​ໂຕ​ໃນບັນດາ​ເສດຖະກິດ​ທີ່​ພັດທະນາ​ແລ້ວ ຈະ​ຍັງ​ຄົງ​ຢູ່​ໃນ​ລະດັບ​ປານ​ກາງ ​ໂດຍ​ການ​ຟື້ນ​ຕົວ​ຂອງ​ເສດຖະກິດ​ໃນ​ພາກ​ພື້ນ ຈຸດ​ໜັກ​ແລ້ວ​​ ແມ່ນຈະ​ຖືກ​ຂັບ​ເຄື່ອນຈາກ​ຄວາມ​ຕ້ອງການ​ພາຍ​ໃນ​ທີ່​ເຂັ້ມ​ແຂງ​ ຈາກ​ບັນດາ​​ເສດຖະກິດ​ກໍາລັງ​ພັດທະນາ, ການ​ສົ່ງ​ອອກ​ທີ່​ອ່ອນ​ນ້ອຍ​ ແລະ​ ການ​ເຕີບ​ໂຕ​​ ທີ່ຫຼຸດລົງ ຂອງ​ການ​ລົງທຶນ ຈະ​ເຮັດ​ໃຫ້ການ​ເຕີບ​ໂຕ​ GDP ຂອງ​ຈີນ​ຫຼຸດລົງ​ຈາກ 9,3% ໃນ​ປີ 2011 ມາ​​ເປັນ 7,7% ​ໃນ​ປີ​ນີ້. ຢ່າງ​ໃດ​ກໍດີ, ​ໃນ​ປີ 2013 ການ​ເຕີບ​ໂຕ​ຂອງ​ຈີນ ຄາດ​ວ່າ​ຈະ​ ຟື້ນ​ຕົວ​ມາ​ທີ່ 8,1 % ຍ້ອນ​ຜົນ​ຈາກ​ມາດ​ຕະການ​ກະຕຸ້ນ​ເສດຖະກິດ ພ້ອມ​ດ້ວຍ​ປັດ​ໃຈ​ຍູ້​ໜຸນ​ເພີ່ມ​ເຕີມ​ຈາກການ​ເພີ່ມ​ຂຶ້ນ​ໃນ​ລະດັບ​ໜ້ອຍ​ໜຶ່ງ ​ຂອງ​ການ​ຄ້າ​ໂລກ.

ທ່ານ ຈິມ ຍ໋ອງ ຄິມ ປະທານ​ ກຸ່ມ​ທະນາຄານ​ໂລກ ກ່າວ​ອີກວ່າ: ສ່ວນ​ແບ່ງຂອງ​ພາກ​ພື້ນ​ອາຊີ​ຕາ​ເວັນ​ອອກ-ປາຊີ​ຟິກ ​ໃນ​ເສດຖະກິດ​ໂລກໄດ້​ເພີ່ມ​ເປັນ​ສາມ​ທົບ​ໃນ​ໄລຍະ​ສອງ​ທົດ ​ສະ​ວັດ​ຜ່ານ​ມາ ຈາກ 6% ມາ​ເປັນ​ເກືອບ 18% ໃນ​ປະຈຸ​ບັນ ​ເຊິ່ງ​​ໄດ້​ເນັ້ນ​ໃຫ້​ເຫັນ​ເຖິງ​ຄວາມ​ສໍາຄັນ​ຍິ່ງ​ຂອງ​​ການເຕີບ​ໂຕ​ຕໍ່​ ເນື່ອງ​​ໃນພາກ​ພື້ນ​​ດັ່ງກ່າວ ທີ່​ມີ​ຕໍ່​ພາກ​ພື້ນ​ອື່ນໆ​ໃນ​ໂລກ, ແມ່ນ​ແຕ່ພາຍ​ໃຕ້​ສະພາບ​ເງື່ອນ​ໄຂ​ທີ່​ຫຍຸ້ງຍາກ​ຂອງ​ໂລກ ​ແຕ່ຄວາມທຸກ​ຍາກ​ໃນ​ພາກ​ພື້ນ ຍັງ​ຄົງ​ຈະ​ສືບ​ຕໍ່ຫຼຸດລົງ ​ໂດຍ​ສ່ວນ​ແບ່ງ​ຂອງ​ຄົນ​ທີ່​ດໍາ​ລົງ​ຊີວິດ​ໂດຍ​ມີ​ລາຍ​ໄດ້ 2 ໂດລາ ຕໍ່​ມື້ ຄາດ​ວ່າ​ຈະຫຼຸດ​ເປັນ 24.5% ​ພາຍ​ໃນ​ທ້າຍ​ປີ 2013 ຈາກ 28.8% ​ໃນ​ປີ 2010.” ພ້ອມ​ນັ້ນ, ທ່ານ​ຍັງ​ໄດ້​ກ່າວ​ຕື່ມ​ອີກ​ວ່າ: “ ຄວາມ​ຕ້ອງການ​ທີ່​ອ່ອນ​ລົງ​ຂອງສິນຄ້າ​ສົ່ງ​ອອກ​ ຈາກ​ອາຊີ​ຕາ​ເວັນ​ອອກ ​ໄດ້​ເຮັດ​ໃຫ້​ເສດຖະກິດ​ພາກ​ພື້ນມີ​ການ​ເຕີບ​ໂຕ​ຊ້າ​ລົງ ​​ແຕ່​ເມື່ອ​ສົມ​ທຽບ​ໃສ່​ພາກ​ອື່ນໆ​ໃນ​ໂລກ, ​ເສດຖະກິດ​ຂອງ​ພາກ​ພື້ນນີ້​ຍັງ​ຄົງ​ເຕີບ​ໂຕ​ຢ່າງ​ເຂັ້ມ​ແຂງ​ ​ແລະ ຄວາມ​ຕ້ອງ​ການ​ພາຍ​ໃນ​ທີ່​ກໍາ​ລັງ​ປັບ​ຕົວ​ຂຶ້ນ ຈະ​ຊ່ວຍ​ເຮັດ​ໃຫ້​ເສດຖະກິດ​ຂອງ​ພາກ​ພື້ນ​ສາມາດ​ຟື້ນ​ຕົວ​ກັບ​ມາ​ໄດ້​ທີ່ 7.6 % ໃນ​ປີໜ້າ .

ອັດຕາ​ການຂະຫຍາຍຕົວ​​​ເສດຖະກິດ ສປປ ລາວ​​ ຍັງ​ຢູ່​ທີ່​ລະດັບ 7,7%

*(ຂປລ): ຕາມ​ເອກະສານ​ລາຍ​ງານ​ເສດຖະກິດ​ປະ​ຈຳປີ​ ຂອງ​ທະນາຄານ​ພັດທະນາ​ອາຊີ (ADB) ປະ​ຈຳ ສປປ ລາວ ​​ໃນ​ຫົວ​ຂໍ້​ ” ທ່າ​ອຽງ​ການ​ພັດທະນາ​ຂອງ​ອາຊີ ” ໄດ້​ແຈ້ງ​ໃຫ້​ຮູ້ໃນ​ວັນ​ທີ 6 ເມສາ 2011 ນີ້ວ່າ: ສປປ ລາວ ​ການ​ຂະຫຍາຍ​ຕົວ​ທາງ​ດ້ານ​ເສດຖະກິດ​ ຄາດ​ວ່າ​ຍັງ​ຄົງ​ຮັກສາ​ຢ່າງ​ໝັ້ນທ່ຽງ​ຢູ່​ທີ່ 7,7% ​ໃນ​ປີ 2011 ແລະ 7,8% ​ໃນ​ປີ 2012 ເນື່ອງ​ຈາກ​ການ​ຟື້ນຕົວ​ຂອງ​ສະພາບ​ເສດຖະກິດ​ໃນ​ອາຊີ​ທີ່​ເປັນ​ຮູບ​ປະ​ທຳ ​ແລະ ການ​ສົ່ງ​ອອກ​ຂອງ​ກະ​ແສ​ໄຟຟ້າ​ເພີ່ມ​ຂຶ້ນ ​ພ້ອມ​ທັງ​ການ​ຂະຫຍາຍ​ການ​ສົ່ງ​ອອກ​ສິນຄ້າ, ການ​ສົ່ງ​ອອກ​ສິນຄ້າ​ ຄາດ​ວ່າ​ຈະ​ເພີ່ມ​ຂຶ້ນ 25% ມູນ​ຄ່າ​ການ​ສົ່ງ​ອອກ​ໃນ​ປີ 2011 ຊຶ່ງ​ຊຸກຍູ້​ດ້ວຍ​ລາຄາ​ສົ່ງ​ອອກ​ທີ່​ລອຍ​ຕົວ​ຂອງ​ທອງ​ ​ແລະ ຄຳ, ການ​ເພີ່ມ​ຂຶ້ນຂອງ​ການ​ສົ່ງ​ອອກ​ກະ​ແສ​ໄຟຟ້າ​ນ້ຳ​ເທີນ​ 2 ແລະ ນ້ຳ​ງື່ມ 2 , ສິນຄ້າ​ນຳ​ເຂົ້າ​ເພີ່ມ​ຂຶ້ນ​ໃນ​ອັດຕາ​ທີ່​ຊ້າ​ລົງ​ກວ່າ​ການ​ສົ່ງ​ອອກ, ​ແຕ່​ການ​ນຳ​ເຂົ້າຂອງ​ເຄື່ອຈັກ ​ແລະ ວັດຖຸ​ສຳລັບ​ໂຄງການ​ຕັ້ງ​ໃໝ່​ ແມ່ນ​ຄາດ​ວ່າ​ຈະ​ເພີ່ມ​ຂຶ້ນ​ໃນ​ປີ 2012 ການ​ຂາດ​ດຸນ​ທາງ​ດ້ານ​ການ​ຄ້າ​ຈະ​ຫຍັບ​ແຄບ​ເຂົ້າ​ປະມານ 8% ​ໃນ​ປີ 2011, ການ​ຜະລິດ​ອຸດ​ສະຫະ​ກຳ​ຄິດ​ເປັນ​ປະມານ 26%ຂອງ GDP ເພີ່ມ​ຂຶ້ນ 17% ຈາກ​ປີ 2010 ການ​ສົ່ງ​ອອກ​ກະ​ແສ​ໄຟຟ້າ​ເພີ່ມ​ຂຶ້ນ 140%​ ຊຶ່ງມາ​ຈາກ​ການ​ເລີ່​ມຜະລິດ​ກະ​ແສ​ໄຟ​ຟ້າ​ຂອງ​ເຂື່ອນ​ນ້ຳ​ເທີນ 2 ການ​ຜະລິດ​ແຮ່​ທາດ​ເພີ່ມ​ຂຶ້ນ 19%, ຈາກ​ປີ​ທີ່​ຜ່ານ​ມາ ​ເນື່ອງ​ຈາກ​ການ​ຜະລິດ​ແຮ່​ທາດ​ຈາກ​ບໍ່​ແຮ່​ໃຫຍ່​ສອງ​ແຫ່ງ​ ໄດ້​ຂະຫຍາຍ​ກຳລັງ​ການ​ຜະລິດ​ເພີ່ມ​ຂຶ້ນ ພ້ອມ​ກັນນັ້ນ ທະນາຄານ​ເອດີ​ບີ​ ຍັງ​ໄດ້ຊີ້ໃຫ້​ເຫັນປັດ​ໃຈ​ອັນ​ຕົ້ນຕໍ ​ສຳລັບ​ພາກພື້ນຈະ​ຍັງ​ແມ່ນ​ການ​ຄວບ​ຄຸມ​ອັດຕາ​ເງິນ​ເຟີ້​ ເນື່ອງ​ຈາກ​ລາຄາ​ນ້ຳມັນ ແລະ ອາຫານ​ທີ່​ເພີ່ມ​ຂຶ້ນສູງ​ຢ່າງ​ໄວວາ​ ພ້ອມ​ທັງ​ການ​ເພີ່ມ​ຂຶ້ນທີ່​ຕໍ່​ເນື່ອງ​ຂອງ​ການ​ປ່ອຍ​ສິນ​ເຊື່ອ​ຂອງ​ ທະນາຄານ, ອັດຕາ​ເງິນ​ເຟີ້​ແມ່ນ​ຄາດ​ວ່າ​ຈະ​ຢູ່​ທີ່​ປະມານ 6,5% ​ໃນ​ປີ 2011 ສິ່ງ​ທີ່​ທ້າ​ທາຍ​ໄລຍະ​ສັ້ນ ລວມມີ​ການ​ບັນລຸ​ລະດັບ​ການຈະ​ເລີ​ນ​ເຕີບ​ໂຕ​ທີ່​ສູງ​ຂຶ້ນ ພ້ອມ​ດ້ວຍ​ຄວາມ​ໝັ້ນຄົງ​ຂອງ​ເສດຖະກິດ​ມະຫາ​ພາກ​ທີ່​ຕໍ່​ເນື່ອງ, ການ​ຮຽກຮ້ອງ​ໃຫ້​ມີ​ນະ​ໂຍບາຍ ​ທາງ​ດ້ານ​ງົບປະມານ ແລະ ການ​ເງິນ​ທີ່​ຫັດ​ກຸມ​ຂຶ້ນ, ການ​ສ້າງ​ຄວາມ​ເຂັ້ມ​ແຂງ​ໃຫ້​ກັບ​ການ​ຄຸ້ມ​ຄອງທະນາຄານ ​ເພື່ອ​ຕອບ​ສະໜອງ​ໃຫ້​ແກ່​ການ​ຂະຫຍາຍ ຕົວ​ທາງ​ດ້ານ​ຈຳນວນ​ຂອງ​ທະນາຄານ​ຢ່າງ​ແຂງ​ແຮງ ​ແລະ ການ​ຮັກສາ​ອັດຕາ​ແລກປ່ຽນ​ເງິນຕາ ​ແລະ ຄວາມ​ໝັ້ນທ່ຽງ​ຂອງ​ລາຄາ​ສິນຄ້າ, ​ໃນ​ໄລຍະ​ກາງ​ ປະ​ເທດ​ຕ້ອງ​ໄດ້​ຂະຫຍາຍ​ຖານ​ເສດຖະກິດ ​ແລະ ການ​ສ້າງ​ວຽກ​ເຮັດ​ງານ​ທຳ​ຫລາຍ​ຂຶ້ນ ​ເພື່ອ​ຮອງ​ຮັບ​ແຮງ​ງານ​ທີ່​ເພີ່ມ​ຂຶ້ນ ບັນຫາ​ຕົ້ນ​ຕໍ່​ແມ່ນ​ຕ້ອງ​ໄດ້​ເພີ່ມ ຄວາມ​ພະຍາຍາມ​ສູງ​ຂຶ້ນ​ໃນ​ການ​ປັບປຸງ​ ເພື່ອ​ສ້າງ​ສະພາບ​ແວດ​ລ້ອມ​ທີ່​ເອື້ອອຳ​ນວຍ ​ຕໍ່​ການ​ດຳ​ເນີນ​ທຸລະ​ກິດ​ ໂດຍ​ສະ​ເພາະ​ແມ່ນ​ທຸລະ​ກິດ​ຂະໜາດ​ນ້ອຍ ​ແລະ ກາງ, ສືບຕໍ່​ພັດທະນາ​ຂະ​ແໜງ​ເອກະ​ຊົນ​, ບັນດາ​ໂຄງການ​ລະດັບ​ໃຫຍ່​ທີ່​ໄດ້​ວາງ​ໄວ້ ຕ້ອງ​ໄດ້​ມີ​ການ​ຕິດຕາມ​ກວດກາ ​ແລະ ຫລຸດຜ່ອນ​ຜົນ​ກະ​ທົບດ້ານ ​ສິ່ງ​ແວດ​ລ້ອມ ​ແລະ ສັງຄົມ​ ເພື່ອ​ຮັບປະກັນ​ໃຫ້ການ​ຈະ​ເລີ​ນ​ເຕີບ​ໂຕ​ດ້ານ​ເສດຖະກິດ​ໃນຕໍ່ໜ້າ​ ສາມາດ​ເປັນ​ການຈະ​ເລີ​ນ​ເຕີບ​ໂຕ​ທີ່​ມີ​ຄຸນ​ນະພາ​ບ ສູງ ​ແລະ ມີ​ຄວາມ​ຍືນ​ຍົງ.

Hello world!

Welcome to WordPress.com! This is your very first post. Click the Edit link to modify or delete it, or start a new post. If you like, use this post to tell readers why you started this blog and what you plan to do with it.

Happy blogging!

This entry was posted on September 24, 2012. 1 Comment